A Organización de Palangreiros Guardeses (Orpagu) chegou a un acordo con Abanca, coa que colabora regularmente, para que a entidade financeira facilite os trámites dos préstamos ICO para axilizar créditos por 4 millóns de euros para os seus armadores.

Segundo informa nun comunicado, o obxectivo da organización que preside Joaquín Cadilla é “simplificar” os trámites para que os seus asociados dispoñan da liquidez necesaria nestes momentos polo impacto do coronavirus.

A frota palangreira da Guarda (Pontevedra) sofre os efectos dunha caída de prezos e unha baixada da demanda, xa que “parte importante” da súa clientela son os establecementos de hostalaría de España e Italia.

Actualmente, unha vintena dos seus 36 barcos de bandeira española xa se acolleron a estes créditos, que o ICO avala nun 80 por cento, segundo explica a entidade. O importe por empresa é duns 280.000 euros de media.

A actividade pesqueira, recoñecida polo Goberno español como esencial para proporcionar á poboación unha alimentación de calidade, mantense estes días por parte dos asociados de Orpagu, a pesar de todos os condicionantes.