O presidente da Xunta, Alfonso Rueda, trasladou este luns a súa felicitación ao Real Club Celta de Vigo por ser “un símbolo” da comunidade dentro e fóra das súas fronteiras, e por facer “historia do fútbol”.

Así o manifestou durante a súa intervención na inauguración da exposición ‘100 anos de Celta. Gol e Arte’ que se abre no Museo do Mar de Galicia dentro do programa de actos con motivo do centenario do club vigués.

O presidente do goberno galego aplaudiu a integración entre fútbol e arte, e sinalou que este diálogo demostra que a entidade celeste é “moito máis que un club de fútbol”, xa que quixo “contribuír á riqueza de Galicia como mecenas cultural”.

A mostra está formada por obras pertencentes ao fondo da Fundación Celta de Vigo, e inclúe pezas de Laxeiro, Antón Pulido ou Quintana Martelo.

“O Celta, ao ser de Vigo, é de Galicia e de todos”, proclamou Alfonso Rueda, que agradeceu ao club presidido por Carlos Mouriño que sexa “un orgullo” para toda a sociedade galega pola súa historia, os seus éxitos deportivos e por “levar a bandeira de Galicia por todo o mundo”.

COLABORACIÓN CO BANCO DE ALIMENTOS

Por outra banda, e tamén dentro da programación con motivo do seu centenario, o club celeste presentou este luns unha campaña de recollida de alimentos, en colaboración co Banco de Alimentos de Vigo, que se porá en marcha a partir do domingo, co partido ante o Athletic Club.

Baixo a lema ‘100 anos, 100 toneladas’, esta iniciativa solidaria permitirá aos afeccionados que acudan ao estadio municipal Abanca Balaídos depositar alimentos non perecedoiros nas portas 18 (bancada de Río) e 10 (Tribuna), que abrirá para esa recollida ás 16,00 horas do domingo.