A dirección de Stellantis Vigo e a maioría do comité de empresa chegaron a un acordo para a aprobación do Expediente de Regulación de Emprego de carácter extintivo, que se aplicará a un máximo de 100 traballadores, e para a regulación temporal dos operarios indefinidos, por un tempo de 60 días ampliables noutros 15 durante o ano 2023.

O acordo foi apoiado polo sindicato maioritario, o SIT-FSI e por UGT e CC.OO., e aplicarase coas condicións de acordos precedentes e ‘dobre voluntariedade’, segundo trasladou a empresa aos traballadores. Este ERE inclúe tanto a persoal mensual e cadro, como a persoal horario.

Así, aplicarase unha extinción incentivada a operarios de 59 anos ou máis, coas “indemnizacións análogas” ás previstas en anteriores expedientes; mentres que a extinción para empregados de menos de 59 anos farase en base a un “proxecto individual”: abonarase unha indemnización dunha anualidade de salario anual bruto por cada 8 anos de antigüidade, cun máximo de dúas anualidades.

Tamén se acordou aplicar a figura da extinción “con dereito de retorno preferente”, é dicir, con posibilidade de que ese traballador se poida reincorporar aos 3 anos, e cunha indemnización equivalente a 1,25 anualidades de salario anual bruto.

OUTRAS MEDIDAS

Por outra banda, tamén haberá suspensións de contrato con dereito a retorno para traballo noutra empresa ou nun proxecto persoal durante 12 ou 24 meses, cun incentivo de 0,5 anualidades de salario e dunha anualidade, respectivamente.

O acordo inclúe tamén o chamado “permiso senior”, un permiso de longa duración para, segundo explicou a empresa ao persoal, “facilitar o tránsito cara á xubilación anticipada”.

REGULACIÓN TEMPORAL

Con respecto ao expediente de regulación temporal de emprego (ERTE), que afecta a unhas 5.000 persoas, acordouse a súa aplicación en 2023 durante 60 días laborables, prorrogables a 75, e coa posibilidade de aplicalo tamén en 2024 se non se esgotaron antes as xornadas de regulación.

Este acordo, que contou co respaldo do SIT e de UGT, supón a aplicación dos días de suspensión a todos os traballadores con contrato indefinido, unha vez esgotada a adecuación de xornada e o saldo dispoñible na denominada ‘bolsa de horas’ (que se amplía excepcionalmente en 2023 ata 35 días en negativo).

Tamén se poderá acceder ao ERTE unha vez consumidas 20 xornadas de bolsa a título individual ou 10 xornadas para aquelas persoas que utilizasen 30 días da bolsa plurianual (ou outros días que lle correspondan individualmente en días de parada de 2021 e 2022).

CUT e CIG, EN CONTRA

Tanto a CIG como a CUT desmarcáronse do acordo de ambos os expedientes, e criticaron que as medidas pactadas precarizan máis a situación do persoal, con condicións “peores” que as de anteriores regulacións. Así mesmo, mantiveron que existen “medidas paliativas” que se poden adoptar sen ter que “esgotar” os días de prestación por desemprego dos traballadores.