A CIG denunciou este martes a redución do persoal de Correos nos concellos do Val Miñor, que provoca que non haxa servizo de atención ao público en horario de tarde.

Nun comunicado, o sindicado asegurou que Correos está “a lastrar” o servizo postal nas localidades pontevedresas de Gondomar, Nigrán, Baiona e Oia.

“Levan máis dunha década marchando contra corrente. Mentres a comarca creceu en máis de mil veciños nos últimos anos e desenvólvense os polígonos industriais da Pasaxe e de Porto do Molle, Correos reduce persoal de repartición e de oficina“, criticou a CIG.

Ademais, os veciños carecen dunha oficina de atención ao público en horario de tarde na zona. “Outro aspecto que en ningún momento se ten en conta por parte da empresa é o crecemento estival”, engadiu a organización sindical, explicando que no verán se triplica a poboación da comarca.