Os servizos de emerxencia axudaron este venres a unha nonaxenaria que sufriu unha caída e quedou atrapada entre dúas paredes do seu domicilio situado na rúa Casal, en Vigo.
Segundo trasladou o 112 Galicia, sobre as 18,15 horas, unha veciña deu a voz de alarma á central de emerxencias indicando que unha muller necesitaba axuda tras caer desde uns dous metros de altura despois de ceder o chan do inmoble e quedar atrapada entre dúas paredes nunha posición de difícil acceso.
Con esta información, o Centro Integrado de Atención ás Emerxencias de Galicia mobilizou ata o lugar aos profesionais de Urxencias Sanitarias de Galicia-061 e aos Bombeiros de Vigo.
Xa no punto, os servizos de emerxencia liberaron á afectada, que puido recibir asistencia por parte do equipo médico desprazado. O 112 Galicia confirmou que as forzas da orde tratan de aclarar as circunstancias deste suceso.
