O estadio municipal de Balaídos volveu a sufrir danos no seu interior por mor das intensas precipitacións das últimas horas, con zonas intransitables no seu exterior tras o desbordamento do río Lagares.

A tenda do club, situada nun dos baixos do estadio, e o túnel de vestiarios foron as zonas máis afectadas, aínda que tamén hai danos na zona mixta e nas oficinas.

A alerta amarela deixou numerosas incidencias no sur de Galicia. O concello de Vigo suspendeu onte a carreira San Silvestre e a festa de Fin de Ano polo temporal de choiva e vento que azouta a Galicia.

O Celta non volverá xogar no seu estadio ata o vindeiro venres 13 de xaneiro, cando recibe ao Villarreal no partido correspondente á décimo séptima xornada da liga Santander.