O delegado do Goberno en Galicia, José Miñones, reivindicou en Mondariz-Balneario a oportunidade que brinda o plan de recuperación do Goberno para restaurar zonas degradadas polos incendios a través do turismo sustentable.

Así o manifestou na presentación do Plan de Sostibilidade Turística ‘Condado Paradanta: destino enogastronómico’, impulsado polo Grupo de Desenvolvemento Rural Condado Paradanta.

Esta iniciativa acaba de obter 1,5 millóns no II Convocatoria extraordinaria do programa de plans de sustentabilidade turística en destino (PSTD) 2022, do Ministerio de Industria, Comercio e Turismo, financiado con fondos do Plan de Recuperación.

“Estamos a deseñar o turismo do futuro de Galicia. Para facer da nosa terra un destino sustentable, competitivo e de calidade de primeiro nivel”, resaltou Miñones.

O proxecto combina intervencións relacionadas coa recuperación de espazos degradados por incendios e especies invasoras con outras centradas no impulso deste destino enogastronómico, tanto de promoción como de posta en marcha de iniciativas específicas (rutas, museo do viño, food truck), coa finalidade da mellora das oportunidades do destino turístico.