O presidente da Autoridade Portuaria de Vigo, Jesús Vázquez Almuiña, non quixo despexar este luns o seu futuro como posible candidato á Alcaldía da localidade pontevedresa de Baiona, da que foi rexedor de 2004 a 2015, pero indicou que en calquera caso o Porto “está ben cuberto”.
Nun almorzo informativo levado a cabo no Hotel Cidade de Vigo, Vázquez Almuiña subliñou que non é “preocupante” para o Porto a súa saída ou non cara a outros compromisos profesionais, xa que a entidade conta cun “magnífico equipo”, polo que “non vai influír” se o presidente é el ou outra persoa xa que “é un máis”.
Así saíu ao paso tras ser preguntado polos rumores que apuntan ao seu regreso á política local de Baiona. Vázquez Almuiña insistiu en que o Porto conta con proxectos “sólidos” e con “proxección de futuro”.
“O día que haxa candidato en Baiona dirase”, reivindicou, destacado que tanto o Porto como o municipio “non terán problema” sexa quen sexa o cabeza de lista. O actual presidente da Autoridade Portuaria engadiu que nos últimos meses houbo varios cambios na dirección de diferentes portos de España e puxo en valor os “valiosos profesionais” cos que traballa cada día na organización de preside.
