O aeroporto de Peinador de Vigo contará con voos directos a Palma de Mallorca, Eivissa, Menorca, Lanzarote e Gran Canaria o próximo verán, segundo informou o alcalde, Abel Caballero, que explicou que serán rutas que lanzará a aerolínea Air Nostrum sen axudas públicas.

En concreto, a empresa ofertará o destino de Palma de Mallorca con tres frecuencias semanais a partir do 15 de xullo, mentres que Eivissa tamén terá tres frecuencias desde o 23 de xullo. Menorca estará dispoñible desde o 16 de xullo con dúas frecuencias á semana, a mesma que terá Lanzarote a partir dese día. Gran Canaria comezará a operar o 2 de xullo con tres frecuencias.

Caballero reivindicou que o aumento do turismo na cidade provoca que as aerolíneas lancen a mercado este tipo de voos desde Peinador, que tamén conta con outras rutas como Madrid, Barcelona, Bilbao ou Santander, esta última apoiada polo Goberno autonómico de Cantabria.