Decenas de traballadores do comercio do metal de Pontevedra, convocados polos sindicatos CIG, CC.OO. e UGT, concentráronse este sábado en Vigo para esixir un convenio “digno” antes de levar a cabo unha folga o vindeiro martes, 22 de novembro.
Encabezados por unha pancarta que rezaba ‘Comercio do metal. Por un convenio digno’, asinada polo tres organizacións sindicais, os empregados manifestáronse ás portas do Instituto Feiral de Vigo (Ifevi) a partir das 12,00 horas desta mañá.
Todo iso en protesta para solicitar a actualización do convenio colectivo do sector, “que leva anos caducado”. Os sindicatos lembraron que o actual documento terminou a súa vixencia en 2019, polo que desde aquel momento tratan de renovar o texto xunto coas patronais “sen que a parte empresarial mostre vontade negociadora”.
“Ante isto, a parte sindical incluso pediu a incorporación deste convenio ao do comercio vario, onde xa están outros sectores comerciais, recibindo tamén unha negativa”, explicaron fontes sindicais. Ademais dos salarios, onde os sindicatos piden un aumento acorde ao IPC, tamén se negocian outras cuestións como a adaptación ao que esixe a reforma laboral no tocante á contratación, a xornada laboral anual e dereitos sociais como licenzas, días de libre disposición ou vacacións.
CC.OO., UGT e CIG aseguraron que cederon en moitas reivindicacións para tratar de chegar a un acordo, “incluso aceptando que non houbese incremento salarial retroactivo para os anos 2020 e 2021”.
