O alcalde de Vigo, Abel Caballero, volveu a cargar contra o presidente da Xunta, Alfonso Rueda, tras ser preguntado sobre se estaría disposto a retomar as negociacións para reunirse co mandatario autonómico: “Ao alcalde de Vigo ninguén lle impón unha entrevista”.

Na súa rolda de prensa diaria, Caballero criticou o “talante anti Vigo” de Alfonso Rueda, lamentando que antes do encontro que ían manter o mes pasado envioulle unha carta “dicindo non a todo o que se lle expuña”.

“Para que imos facer unha reunión? As entrevistas co alcalde de Vigo páctanse. Ao alcalde de Vigo ninguén lle impón unha entrevista”, sentenciou.

Todo iso despois de que todos os alcaldes das outras seis grandes cidades galegas, fosen do partido político que fosen, xa se reunisen ao longo das últimas semanas con Alfonso Rueda. Con todo, Caballero rexeitou acudir ao seu encontro.

ORZAMENTO VIGO

Noutra orde de cousas, Abel Caballero volveu a dar algún dato máis dos orzamentos municipais para 2023, ano no que levarán a cabo as eleccións á alcaldía.

Así, insistiu en que as contas basee serán de 292 millóns de euros, un 2,25% máis. A esta cifra habería que sumarlle polo menos 10 millóns de euros de fondos europeos, 5,2 millóns para axudas a libros de texto, un crédito extraordinario de 45 millóns e outro de 33 millóns. En total, ascenderían a 385,3 millóns, un 35% máis que en 2022.

Desta cantidade, uns 56,6 millóns irán parar ao apartado de Benestar, un 5% máis, mentres que Seguridade, Tráfico e Bombeiros terán un orzamento de 47,1 millóns, un 18% máis. Limpeza suporá un gasto de 44,7 millóns e para Cultura o Concello destinará 16,3 millóns de euros, así como outros 13,4 millóns para Transporte.

Entre outras partidas, Medio terá 18,2 millóns de euros, un 17% máis, e Emprego, 5,2 millóns. Ademais, Caballero destacou que uns 160 millóns destinaranse a investimento, multiplicando por dez o investimento dun ano media.