Urbano Bernabé Multiservicios, compañía subcontratada encargada da limpeza da fábrica automobilística de Stellantis en Vigo, subliñou que “non desexa impor un convenio colectivo”, o que busca é “cumprir a legalidade vixente” e aplicar o convenio “que corresponda segundo a actividade realmente realizada”.

Así saíu ao paso a empresa despois de que o seu persoal iniciase a semana pasada unha folga indefinida para denunciar a intención da firma de cambiarlles de convenio colectivo, de forma que pasarían a estar adscritos ao convenio de transporte de mercadoría por estrada, no canto do de limpeza da provincia de Pontevedra.

Nun conciso comunicado, Urbano Bernabé reivindicou que mantivo “inalteradas todas e cada unha das condicións laborais dos empregados subrogados”, e que “non desexa impor un convenio colectivo”. Ademais, asegurou que está a respectar o exercicio do dereito de folga, aínda que solicitou que se respecte tamén o dereito ás persoas non folguistas a traballar e que os piquetes sexan informativos.

“Por último, desde a empresa se aposta polo diálogo social e por iso é a propia empresa a que solicitou mediación ante as autoridades laborais tras a enésima convocatoria de folga”, sentenciou.

Todo iso despois de que o persoal iniciase unha folga a semana pasada pola pretensión da empresa do cambio de convenio a partir de 2023 e pasar a aplicar o de transporte de mercadoría “que nada ten que ver cos seus labores e que supón unha grave precarización en materia económica, social e de estabilidade no emprego”, segundo denuncian os traballadores.

As persoas traballadoras lamentaron que este cambio suporía unha redución dos seus dereitos e que elas non realizan labores de transporte, senón que limpan a factoría de Stellantis.