O vicepresidente primeiro e conselleiro de Economía, Industria e Innovación, Francisco Conde, pediu ao Goberno central que “acelere” a convocatoria do “grupo de traballo comprometido” e “impulse” un novo Perte que permita a Stellantis “garantir o seu futuro” en Vigo.
En declaracións aos medios nun comercio de Santiago, o vicepresidente primeiro asegurou que o futuro da factoría viguesa “depende dun novo Perte” e dunha “iniciativa por parte do Goberno que permita vincular os investimentos de Stellantis para desenvolver as novas plataformas”.
Así, insistiu en demandar ao Executivo central que convoque “canto antes o grupo de traballo comprometido” e determinar deste xeito novas medidas para que a multinacional “identifique as axudas e desenvolva estes investimentos”. Conde remarcou que o Perte actual “se demostrou que foi un fracaso”, “independentemente de que Stellantis poida entrar, pero cun investimento mínimo”, xa que “en ningún caso garante o futuro da planta en Vigo”.
Ademais, o titular de Economía sinalou que nestes momentos a situación de Stellantis “está comprometida” pola “falta dun Perte que realmente permita os investimentos”, así como debido a que “o Goberno mantén as súas discrepancias internas sobre a construción da subestación Novo Vigo”, polo que “desde o punto de vista enerxético” indicou que “tampouco hai unha solución por parte do Goberno”.
“É urxente que o Goberno asuma que o sector da automoción en Galicia necesita de respostas que permitan eses investimentos que nestes momentos non está a ter”, remarcou Conde.
