A delegada da Xunta en Vigo e candidata do PP á Alcaldía da cidade, Marta Fernández-Tapias, acusou este mércores ao alcalde, Abel Caballero, de “prexudicar gravemente aos vigueses” ao negarse a manter unha reunión co presidente galego, Alfonso Rueda.
Segundo sinalou, desde o goberno autonómico tentouse “buscar un punto de encontro para desbloquear proxectos, infraestruturas e servizos” para a cidade, pero o alcalde “negouse”. “Este mesmo martes a súa compañeira de partido (Inés Rey, rexedora da Coruña) deixou claro que o seu principal obxectivo é beneficiar os seus veciños, e non só acudiu á reunión con Alfonso Rueda, senón que tamén foi coa vontade de chegar a acordos”, constatou a delegada territorial.
Por contra, lamentou, “en Vigo está todo paralizado polo alcalde”. “É indignante. Non creo que ningún vigués estea de acordo no bloqueo ao Casco Vello, á estación de autobuses, á ETEA ou a Navia. Outras cidades avanzan mentres o alcalde segue inmerso en guerras absurdas co único obxectivo da rendibilidade electoral”, engadiu. Respecto diso, apuntou que o propio Abel Caballero “recoñece de forma implícita” que “o único que buscaba era o seu propio interese” ao afirmar que non concede fotos electorais.
Preguntado acerca destas críticas, o rexedor olívico volveu insistir en que a reunión con Rueda “era unha pantomima” e que o Concello recibiu a “negativa” do presidente a todas as reclamacións que lle expuxo por escrito. “Envieille 45 puntos a Rueda, e a resposta foi ‘non’ a todo. Eu non dou entrevistas a quen previamente di que ‘non'”, sentenciou.
Abel Caballero esixiu a Rueda “que explique á cidade por que noutras cidades todo é ‘si’ e todo son investimentos”, mentres rexeita as formulacións de Vigo. “Se alguén volve negar esta cidade e a maltratala, que non conte comigo para darlle ningún beneplácito”, aseverou, e puxo como exemplo o investimento da Xunta na conexión da Cidade da Cultura coa AP-9 mentres que “no Ifevi non fai nada” para mellorar os accesos.
