A Garda Civil de Pontevedra abriu unha investigación para esclarecer as circunstancias da morte dun home que recibiu unha malleira o pasado fin de semana na Guarda, no transcurso dunha liorta, e que acabou falecendo días despois como consecuencia das lesións.

Os feitos ocorreron na noite do pasado domingo nun domicilio desta localidade, onde se produciu unha liorta por motivos que se están investigando. No transcurso da pelexa, catro persoas resultaron feridas, das cales dúas tiveron que ser evacuadas ao Hospital Álvaro Cunqueiro de Vigo.

Destas dúas persoas que foron hospitalizadas, un home acabou falecendo días despois e a outra permanece ingresada, segundo informan a Europa Press fontes coñecedoras da investigación.

A Unidade Orgánica de Policía Xudicial (UOPJ) da Garda Civil iniciou as pescudas para aclarar o sucedido e ten abertas varias hipóteses, entre elas que a pelexa se producise por un ‘axuste de contas’ relacionado co tráfico de drogas, e que nela estivesen involucrados cidadáns portugueses.