O grupo municipal Marea de Vigo levará ao próximo Pleno da cidade unha moción para instar á Corporación a situarse contra “as rebaixas fiscais para ricos” que o PP está a aprobar nalgunhas Comunidades Autónomas.
O portavoz do grupo, Rubén Pérez Correa, lamentou que “as vacacións fiscais” para as persoas máis ricas póidanse implantar tamén en Galicia “da man do presidente Rueda”, o que supón replicar o “modelo populista de Díaz Ayuso, Moreno Bonilla ou López Miras”.
Segundo sinalou, en Galicia recádanse 66,6 millóns ao ano a través do imposto sobre o patrimonio, que grava a 7.646 persoas que suman unha riqueza de case 50.000 millóns. Esa recadación, incidiu, “está moi por baixo do que debería”, e esta situación “é crónica”.
Na súa moción, Marea de Vigo denuncia “unha verdadeira rebelión dos ricos”, apoiados pola dereita e a ultradereita, para “profundar máis nesta inxustiza fiscal”, polo que insta o Concello de Vigo a situarse e esixir ao Goberno central unha modificación do imposto (cuxo rendemento está cedido ás Comunidades Autónomas) para que sexa un tributo “máis progresivo”, e que se elimine a posibilidade de bonificacións.
Tamén reclama á Xunta de Galicia que non elimine este imposto e non siga “a senda” doutras rexións gobernadas polo PP, como Murcia, Madrid ou Andalucía.
