A Policía Nacional de Vigo detivo na cidade olívica a un home que transportaba 900 gramos de cocaína no seu coche e ata 3.750 euros en efectivo, ademais dun quilogramo de sustancias de corte da droga e múltiples útiles de adulteración e distribución.

Tal como informaron os axentes nun comunicado, esta intercepción foi froito dunha investigación que se centrou sobre unha persoa que podería ser a responsable dun importante nó de distribución entre provedores e vendedores finais de cocaína, utilizando para iso un trasteiro dun céntrico edificio de Vigo.

O investigado foi ‘cazado’ cando se dispuña a saír da garaxe do inmoble, comprobando que no interior do vehículo que conducía portaba ocultos case 900 gramos de cocaína. Ademais, confirmouse que o trasteiro se utilizaba como un laboratorio de disgregación, adulteración e distribución de cocaína. O detido foi posto a disposición do Xulgado de Instrución número 7 de Vigo, que decretou o seu ingreso en prisión.