Axentes da Policía Local de Vigo denunciaron nos últimos días dous condutores que circulaban baixo os efectos das drogas e, un deles, facíao coa Inspección Técnica de Vehículos vencida.
Segundo informaron fontes policiais, a primeira intervención tivo lugar a pasada semana, cando unha dotación do 092 que facía labores de control do tráfico localizou un vehículo coa ITV caducada.
Ao darlle o alto e identificar o condutor (A.A.D., de 48 anos de idade) os axentes decatáronse de que presentaba signos de estar baixo os efectos dalgunha sustancia estupefaciente, polo que lle fixeron unha proba. O test deu resultado positivo para opiáceos e cocaína.
Nunha segunda intervención, unha dotación de Policía Local sorprendeu na madrugada deste venres un condutor circulando pola Avenida de Citroën coas luces apagadas.
O home, que resultou ser A.L.M., de 38 anos, fixo caso omiso das indicacións dos axentes para que se detivese e, cando finalmente o fixo, foi sometido a un test de drogas, que deu resultado positivo para THC.
