Os curtos do Instituto de Investigacións e Experiencias Cinematográficas e da Escola Oficial de Cinematografía protagonizan o Festival Internacional de Cinema de Bueu, segundo informa a organización.
En 2019, o festival inaugurou a sección retrospectiva, “un apartado dedicado aos fitos máis importantes da historia do cinema en formato curta a través das súas obras”. Froito do traballo de documentación posto en marcha para crear esta categoría, naceu o proxecto ‘Cadernos FICBUEU’, publicacións recompilatorias paralelas ao contido da sección.
Agora, explica a organización, poñerase o foco en España, “analizando as pezas realizadas no Instituto de Investigacións e Experiencias Cinematográficas e na Escola Oficial de Cinematografía durante o período que abarca os anos de 1947 ata 1976″, considerado un dos xermes do cinema español actual”.
