O presidente da Xunta, Alfonso Rueda, apuntou a que os incendios declarados esta semana nas localidades pontevedresas de Arbo e A Cañiza –que afectan a 350 e 25 hectáreas respectivamente– foron provocados e asegurou que a situación “xa non é tan preocupante”.
En declaracións aos medios en Moraña, Rueda recoñeceu que aínda que a situación “xa non é tan preocupante”, as circunstancias meteorolóxicas con “moi altas temperaturas que dan para gozar das praias e das festas tamén fai máis delicado o tema dos incendios”.
Ante a posible intencionalidade destes lumes, o titular do Goberno galego advertiu de novo que “queimar o monte é un delito”. “Ponse en perigo a persoas e aos bens e casas de moita xente, por tanto, vai ser perseguido e os culpables detidos e postos a disposición da xustiza”, insistiu.
