O Marisquiño vén de mostrar a súa ledicia “polo feito de que todas as persoas feridas no accidente do pasado domingo 12 de agosto sexan dadas de alta, excepto dúas que se atopan fóra de perigo e farano nos próximos días. Esperamos e desexamos que todos os feridos se recuperen canto antes”.

Destacaron ademais desde a organización o apoio recibido “por parte dos seguidores do festival, os patrocinadores, a Asociación de Festivais de Galicia e riders nacionais e internacionais. Tamén damos as grazas a voluntarios anónimos que axudaron aos feridos e ao gran traballo dos equipos sanitarios, así como a todos os corpos de seguridade, Policía Nacional, Policía Portuaria, Bombeiros, Policía Local e Protección Civil”.

Tamén agradeceron as mensaxes de solidariedade recibidos de distintas partes do mundo a través das Redes Sociais, e o apoio das tres Federacións Internacionais que conceden as competicións coas que conta o evento: a World Cup Skateboarding, a FIBA -Federación Internacional de Baloncesto- e a FMB de Dirt Jump.

“Todas elas transmitíronnos a súa confianza na organización e os seus ánimos para continuar no futuro coas probas que puntúan no ranking mundial e como plataforma de clasificación para as Olimpíadas de Xapón 2020”, engaden.

O Marisquiño espera que a investigación xudicial, na que aseguran estar colaborando, “poida aclarar as causas do sucedido e establecer as oportunas responsabilidades”. Mañá martes 21 de agosto ás 14.00 horas presentarán “No more”, o vídeo oficial de O Marisquiño 2018, dedicado a todos os feridos, voluntarios e servizos de urxencia.