Lucía Jiménez Martínez e Inés Rolland Porto representarán aos mozos galegos no Cume de Mozos polo Clima, que se celebrará en Madrid a partir deste luns e ata o mércores, 29 de xuño, no marco de 1Planet4All, unha iniciativa de Ayuda en Acción organizada por Nuevas Promesas e cofinanciada pola Unión Europea.

Tal como indicaron desde a organización, a cita clausurará este programa de liderado e concienciación climática convidando os 50 participantes con mellor desempeño, proclamados líderes por veredicto dun xurado profesional, a representar á súa xeración para construír solucións que freen a emerxencia climática.

Jiménez e Rolland, do Colexio Apóstolo Santiago de Vigo, participaron nesta iniciativa e foron escollidas de entre máis de 4.000 participantes de toda España polo seu liderado e capacidade de comunicación.

Durante a súa celebración, o Cume de Mozos polo Clima facilitaralles oportunidades para afianzar redes de colaboración, acelerar as súas capacidades para provocar impacto social e adestrar as súas habilidades de liderado.

Este evento contará coa colaboración de profesionais activos na súa comunidade e institucións preocupadas pola súa contorna, que se sumarán á celebración das súas actividades.