Un equipo do Centro de Investigacións Biomédicas (Cinbio) da Univerdidade de Vigo (UVigo) deseñaron unhas lentes de contacto que permiten a recollida e a análise de biomarcadores lacrimais para a detección de enfermidades.
Tal como informou o Diario da Universidade de Vigo (Duvi), a análise química das bágoas humanas cobrou unha gran importancia nos últimos anos debido a que pode axudar a diagnosticar enfermidades como o cancro de mama, a esclerose múltiple ou o párkinson.
Con todo, a recollida das mostras necesarias só pode ser realizada por persoal sanitario cualificado, e existen obstáculos relativos á comodidade dos pacientes. Ademais, son mostras de curta duración, 5 minutos aproximadamente, o que pode derivar nun problema en termos da sensibilidade da análise.
“Ademais, a mostra obtida debe estar suxeita a unha serie de procedementos físicos e químicos antes da súa análise, procedementos que non só engaden un maior grao de complexidade e custo no proceso, senón que poden alterar os propios valores fisiolóxicos da mostra, e adulterar en certos casos os resultados”, explicaron desde a UVigo.
Por iso, investigadores do TeamNanoTech do Cinbio presentaron unha innovadora estratexia de detección, unhas lentes de contacto híbridas que permiten a recollida e a análise dos biomarcadores lacrimais para a diagnose, o prognóstico e o seguimento de diferentes enfermidades.
Este avance científico recóllese nun estudo publicado na revista ‘Nanoscale’, que está asinado polo director do Cinbio, Miguel A. Correa-Duarte, así como polos investigadores do devandito centro Moisés Pérez-Lorenzo, Andrea Mariño-López e Belén Vaz, ademais do investigador Ramón A. Álvarez-Puebla da Universitat Rovira i Virgili de Tarragona.
Tal como explicaron, a extracción de mostras de bágoas son levadas a cabo en centros sanitarios por persoal especializado, pero este traballo pretende abrir a porta ao desenvolvemento de dispositivos oculares que permitan realizar esa recollida fóra da contorna clínica.
