A exposición ‘Ilustrando Rías Baixas’, que chega o 22 de xuño a Vigo, mostrará puntos das Rías Baixas desde sete perspectivas diferentes, as de sete artistas da provincia de Pontevedra que utilizarán distintas técnicas de ilustración como acuarela, lenzo, enforma de libro ilustrado ou dixitais, ou mesmo esculturas iluminadas.

A mostra, impulsada pola Deputación de Pontevedra, poderá verse ata o 19 de agosto na Sala Rosalía de Castro da sede do Goberno provincial en Vigo. Alí, Andrea Jano, Kiko da Silva, Clara Cerviño, Carlos Castro, Eduardo Baamonde, Lara Lars e o dúo Nuvi & Éxfico, creadores de diferentes xeracións, mostrarán a súa visión sobre sendas e bosques, rutas polas cidades, espazos patrimoniais ou lugares e persoas “tan especiais como únicos”.

Segundo informa a Deputación nun comunicado, á inauguración da exposición asistirán representantes do movemento cultural e social da cidade olívica e contará ademais cunha acción artística que “mestura ilustración e narración, ‘Pincel e voz para unha illa portátil’, que ofrecerá Andrea Jano xunto á autora Silvia Penas. Para asistir á inauguración é necesario inscribirse no correoparticipa.cultura@depo.gal.

Ademais, baixo o pretexto da exposición, están previstas actividades complementarias, como a mesa redonda sobre ‘A ilustración en Galicia hoxe’, que se celebrará o 26 de xullo coa participación de Kiko da Silva, Lara Lars, Eduardo Baamonde e Nuvi & Éxfico. Haberá tamén talleres dirixidos ao público xeral durante o mes de agosto. O primeiro será o día 1, ofrecido por Carlos Castro e baixo o título ‘Urban sketching’; mentres que o segundo terá lugar o día 9 con Clara Cerviño, co título ‘Ilustrando faros’.