O Consello de Administración do Porto de Vigo aprobou este venres de forma definitiva a adxudicación da concesión do antigo estaleiro Vulcano aos actuais propietarios das instalacións, Astilleros San Enrique, ten un prazo de dous anos para facer investimentos por algo máis de 1,6 millóns de euros co fin de reactivar a construción e/ou reparación naval.

Deste xeito, a partir de agora San Enrique pode desenvolver os investimentos que expuxo na súa oferta, para reformar as instalacións, instalar placas fotovoltaicas, pór a punto guindastres, medidas de protección contra a contaminación mariña, adecuación de redes de subministración, etc.

Con todo, a empresa ten que cumprir unha serie de fitos nos próximos anos, por exemplo, ten que ter un volume de negocio anual de 10 millóns de euros durante os dous primeiros anos da concesión (que é de 15 anos), e este debe incrementarse progresivamente ata os 14,6 millóns anuais en 2036. Tamén deberá cumprir o seu compromiso de contratación de traballadores (28 persoas o primeiro ano e chegar a un persoal de polo menos 79 ao final da concesión).

O Porto fará un “seguimento” de todo o proceso para constatar que se cumpren as condicións da adxudicación da concesión, segundo explicou o presidente do organismo, Jesús Vázquez Almuíña, que tamén matizou que se mantén a pretensión da Autoridade Portuaria de adquirir a parte privada do estaleiro (os terreos que non son portuarios).

Vázquez Almuíña trasladou a súa esperanza de que leste mesmo ano tanto as instalacións da antiga Vulcano como as de Barreras (que está en proceso de liquidación e á espera de que o xulgado adxudique a unidade produtiva) poidan retomar os seus proxectos industriais. No caso da primeira, sinalou, os novos donos aseguran ter avanzados as negociacións comerciais para pechar pronto contratos.