O incendio que afectou a unha nave industrial no Porriño quedou extinguido esta tarde, segundo informa o 112 Galicia. O lume tamén queimou dous turismos, unha furgoneta e unha máquina elevadora.
Respecto diso, os servizos de emerxencia sinalan que continuarán vixiantes por se é necesaria a súa intervención por un lume que se declarou uns minutos antes do mediodía deste mércores, cando varias persoas alertaron do lume nunha fábrica situada no polígono da Granxa, no Porriño.
Desta maneira, foi posto en marcha o Plan Territorial de Protección Civil da Comunidade Autónoma de Galicia (Platerga), para garantir unha resposta coordinada ante a situación de risco provocada polas chamas. As primeiras informacións apuntan a que unha faísca de soldadura podería ser o detonante do incendio nesta nave da empresa Distribucións Pako, dedicada á distribución de maquinaria industrial.
No lugar estiveron traballando para a extinción do mesmo os Bombeiros do Porriño, os Bombeiros de Vigo, os Bombeiros de Ribadumia, os Bombeiros do Morrazo, así como o GES de Ponteareas e de Mos, ademais da Policía Local e a Garda Civil. Tamén se incorporou o Grupo de Apoio Loxístico (GALI) da Axencia Galega de Emerxencias (Axega), que achegou unha cisterna de gran capacidade. Ademais, os seus drones inspeccionan a zona, debido a que a nave quedou “totalmente calcinada”.
SEN AFECTACIÓN A PERSOAS NIN A OUTRAS NAVES
Fontes municipais indicaron que non habería persoas afectadas o lume, xa que o persoal que estaba dentro da factoría no momento no que comezou a arder estaría localizado e en bo estado. A pesar diso, foi mobilizada unha ambulancia de urxencias sanitarias por se fose necesario atender a algunha persoa no lugar do suceso.
Así mesmo, grazas á acción dos medios de emerxencia, o lume non se propagou a outras naves próximas, a pesar de que a magnitude das chamas fixo temer que houbese risco de que o teito das instalacións se esborrallase. Ata o lugar desprazáronse, entre outros, a delegada territorial da Xunta en Vigo, Marta Fernández-Tapias, así como o alcalde do Porriño, Alejandro Lorenzo.
