A delegada territorial da Xunta en Vigo, Marta Fernández-Tapias, visitou este venres ao alumnado do colexio Escultor Acuña da cidade olívica, onde participou na actividade do programa ‘Vexo, vexo Xacobeo’, para dar a coñecer o patrimonio do Camiño de Santiago.
“Estamos ante unha excelente actividade para que os máis pequenos coñezan o noso patrimonio e para a posta en valor do Camiño de Santiago, que constitúe unha canle extraordinaria para o intercambio cultural entre o noso territorio e o resto de Europa, de forma que permite promover o interese e o respecto cara outras culturas, recoñecendo ao mesmo tempo a riqueza dos seus signos de identidade”, indicou Fernández-Tapias.
No caso da área de Vigo, o programa levarase a cabo nun total de seis colexios, polo que case 500 alumnos de Infantil e Primaria participarán nel. Segundo explicou a Xunta nun comunicado, ‘Vexo, vexo Xacobeo’ naceu en 2021 para divulgar, sensibilizar e promover os Camiños de Santiago e o Ano Santo Xacobeo a través do conto, a lectura e a teatralización.
A delegada da Xunta explicou que a iniciativa pretende recuperar o patrimonio inmaterial e achegar o intercambio cultural a través da tradición oral á rapazada.
