A delegada territorial da Xunta en Vigo, Marta Fernández-Tapias, lembrou este luns ao Concello da cidade que, a día de hoxe, están sen executar máis de 6 millóns de euros destinados á recupereación do oito áreas de rehabilitación integral (ARI) da cidade.
Segundo apuntou, neste momento os convenios en Vigo suman un total de 8 millóns de euros, dos que 6 están pendentes de executar. Por tanto, “só unha cuarta parte (dos fondos) foron efectivos”.
Marta Fernández-Tapias sinalou que as ARI de Vigo foron “as máis beneficiadas” na asignación feita pola Xunta en 2021, con máis de 2 millóns de euros. Ademais, o ano pasado a administración autonómica deu luz verde á declaración doutras catro áreas de rehabilitación: Beiramar, San Pablo, San Roque e Espiñeiro-Teis.
No caso dos concellos que teñen máis dunha ARI, como é o caso de Vigo, son os concellos os encargados de distribuír os fondos entre as diferentes áreas. Así mesmo, deben regular os prazos para a presentación de solicitudes por parte dos propietarios de vivendas interesados na súa rehabilitación.
