O alcalde de Vigo, Abel Caballero, confirmou este luns que a obra de peonalización de Porta do Sol, que inclúe un túnel entre Policarpo Sanz e Elduayen-Torrecedeira, continuará tras recibir o visto e prace de Patrimonio Histórico da Xunta, e a pesar de “tres señoritos que pretendían paralizar a actuación”.

O rexedor sinalou que, tras o informe favorable da administración autonómica, que apunta que os restos arqueolóxicos localizados durante a escavación do chan non teñen valor singular, os traballos retomaranse e a obra en superficie estará rematada este verán. “Isto atrasounos un mes, pero non altera a obra”, apuntou.

Abel Caballero fixo referencia á oposición mantida por “uns pouquiños” a este proxecto, e sinalou que se trata de “tres ou catro que se cren uns señoritos que mandan en Vigo”. “Pero en Vigo manda a democracia e a xente e, unha vez máis, perderon, tentaron parar a obra e perderon”, sentenciou.

Segundo o alcalde, “na cidade non se paraliza nada porque tres señoritos protesten e crean que a cidade é deles” e engadiu que iso pasaba antes, con alcaldes e alcaldesas que o precederon e eran “débiles”. “Axiña que pasaba algo, paraban unha obra”, afirmou Caballero.

O rexedor puxo como exemplo a Avenida de Arquitecto Palacios, que se finalizou nun semáforo “porque protestou unha asociación de veciños”. “Aquí as protestas non, isto é a democracia e o respecto”, resolveu.