A Cooperativa de Armadores de Pesca do Porto de Vigo (ARVI) anunciou que celebrará o seu festival do peixe Vigo Seafest 2022 entre os días 7 e 10 de xullo na contorna dos Xardíns de Elduayen e o Paseo das Avenidas. Nun comunicado, ARVI puxo en valor dito evento, que constitúe “unha cita de referencia” para a gastronomía do mar e reafirma Vigo “como capital europea da pesca”.

A cociña de autor, baseada en produtos do mar e representada por un elenco de 14 chefs galegos, será o epicentro dun evento de lecer familiar, que contará cunha “ampla” programación de showcookings, concertos diúrnos, talleres infantís, actividades deportivas, espectáculos e animación, ademais dunha gran exposición, onde se dará cita a industria pesqueira.