A Xunta de Galicia lembrou que pediu ao Tribunal Supremo que aclare a sentenza que obriga a pagar catro millóns de euros por deficiencias na depuración de augas en Vigo e Ribeira que afectaban a senllas rías.

Preguntada respecto diso nunha rolda de prensa ofrecida este venres, a conselleira de Infraestruturas e Mobilidade, Ethel Vázquez, asegurou que esa sentenza se corresponde con dúas obras, a depuradora de Ribeira e a depuradora de Vigo, que fixo “Aquaes a través do Goberno de España”.

“Están executadas xa desde o ano 2017 e o Goberno de España, cando se iniciou este procedemento recoñeceu que era a súa competencia e que era a súa responsabilidade porque executou as obras”, sostivo a conselleira, que se mostrou “sorprendida” do “cambio de criteiro” polo “cambio de goberno”.

“Cambia o goberno e de súpeto indica que a responsabilidade é da comunidade autónoma sendo, ademais, depuradoras municipais que unicamente se declararon de interese da comunidade autónoma para conseguir fondos europeos”, explicou. “A responsabilidade hai que buscala nese cambio de criterio que non entendemos nin compartimos do Goberno de España”, afirmou a conselleira.