Máis de 800 deportistas participarán este domingo na oitava edición da ‘Gran Bikedada’, unha cita deportiva e solidaria que este ano achega novidades “máis esixentes”, como a proba de ultrafondo, cun percorrido de 110 quilómetros con saída e chegada a Vigo, e pasando por 6 municipios da comarca.
A proba foi presentada este martes polo responsable do Social Ciclismo Fan Manager (organizador do evento), Pepe Xagarós, e, como cada ano, o diñeiro recadado coas inscricións, que chegaron a 812, destinarase a fins solidarios, a proxectos de cooperación en Guatemala.
Na oitava edición desta proba “clásica”, tras o parón obrigado pola pandemia o ano pasado, mantéñense os percorridos das probas de gran fondo (100 km), fondo (69 km) e medio fondo (42 km), pero incorporarase unha cronoescalada de 4 quilómetros, entre Castiñeira e Amoedo.
Con todo, a gran novidade é a incorporación da proba de ultrafondo, de 110 quilómetros e só para os moi preparados. Esta ruta, como o resto, sae de Vigo, e percorrerá os montes de Chapela (pola Senda da auga), Os Valos, Amoedo, Eiras e o miradoiro de Penarada (538 metros de desnivel), para volver á cidade.
Precisamente, esa subida a Penarada é o punto máis esixente da proba, segundo sinalou o campión de España de ultramaratón Brandán Márquez, que matizou, no entanto, que a ‘Gran Bikedada’, con todas as rutas alternativas que ofrece, “é unha proba para todos, con percorrido moi ciclable”.
