Axentes da Policía Autonómica, en colaboración con efectivos da Policía Nacional, levantaron acta de infracción contra un condutor en Vigo, ao que lle interviñeron 38 quilos de percebe dos que non puido acreditar a súa procedencia.
Segundo informaron fontes da Xunta, os feitos ocorreron este martes, cando a Policía Autonómica, a requirimento da Policía Nacional, realizou unha inspección a un vehículo cuxo propietario transportaba tres caixas cheas de percebes.
O condutor foi identificado e levantouse acta por unha presunta infracción da Lei de Pesca de Galicia, xa que o home non achegou etiqueta de rastrexabilidade, nin factura que acreditase a orixe do marisco.
En total, os percebes comisados pesaban 38 quilos e foron repartidos entre centros benéficos do Concello de Vigo.
