Todos os sindicatos presentes no Grupo Nueva Pescanova (CC.OO., UGT, CIG, USO e CUT) chegaron a un preacordo coa empresa en materia salarial para os próximos anos, que inclúe unha subida de soldos do 2,5% para este ano e dun 2% para 2023 e 2024.
Nun comunicado conxunto, os sindicatos explicaron que a compañía tamén terá que pagar de forma retroactiva unha subida do 2,5% para o ano 2021, por tanto, “as táboas salariais do 2022 serán uns 5% superiores ás actuais”. A maiores, a empresa abonará tamén unha paga única de 350 euros a todo o cadro de persoal, “independentemente da súa xornada laboral”.
Neste sentido, os sindicatos destacaron que a subida directa entre os catro anos (2021-2024) é superior ao 9% e que a estas subidas se suma que se o IPC destes anos fose superior ao incremento acordado, compensarase co 75% desa diferenza, co pago de atrasos e coa actualización de táboas salariais do ano 2024 a principios de 2025. “Estas melloras non foron fáciles de conseguir e foron grazas á unidade de todos os traballadores, así como dos sindicatos e dos delegados dos diferentes comités do Grupo Nueva Pescanova”, engadiron.
Así mesmo, explicaron que aínda quedan pendentes diferentes cuestións en cada convenio, pero unha vez chegado a un acordo de subida salarial, agora é o momento de facer unha asemblea xeral para explicar e votar este punto. Por iso, dita reunión levará a cabo o vindeiro domingo 13 de febreiro ás 11,00 horas no Centro Veciñal e Cultural de Valladares, en Vigo.
