O Concello de Vigo ordenou a retirada “inmediata” da campaña antiabortista instalada en marquesiñas e mupis de toda a cidade, despois da gran controversia que esta publicidade creou.
O Concello indicou que en canto tivo coñecemento destes carteis, ordenou a retirada dos mesmos, manifestando o seu “absoluto rexeitamento” a calquera campaña que atente contra os dereitos das mulleres.
Todo iso despois de que Marea de Vigo e o BNG vigués esixisen na mañá deste luns a retirada da campaña antiabortista que a Asociación Católica Propagandistas (AdcP) instalou nas marquesiñas e nos mupis da cidade.
A concelleira de Marea de Vigo Oriana Méndez asegurou que esta publicidade incumpre o contrato adxudicado polo Concello á empresa JCDecaux, “que impide claramente a presenza de propaganda sexista ou vexatoria contraria aos dereitos constitucionais”.
Na mesma liña falou o concelleiro nacionalista, Xabier P. Igrexas, que sinalou que se trata dunha propaganda “reaccionaria” da “dereita ultracatólica” que usa estes paneis para propagar o seu “discurso do odio”.
Esta controversia produciuse despois de que a Asociación Católica de Propagandistas (ACdP) lanzase unha campaña antiabortista en 33 cidades de toda España baixo o lema “Rezar fronte ás clínicas abortistas está xenial” para manifestarse contra a Lei do Aborto que expón o Goberno.
