Marea de Vigo e o BNG vigués esixiron a retirada da campaña antiabortista que a Asociación Católica Propagandistas (AdcP) instalou nas marquesiñas e nos mupis da cidade. Así, nun comunicado, a concelleira de Marea de Vigo Oriana Méndez asegurou que esta publicidade incumpre o contrato adxudicado polo Concello á empresa JCDecaux, “que impide claramente a presenza de propaganda sexista ou vexatoria contraria aos dereitos constitucionais”.
Por iso, solicitou á concellaría de Mobilidade e Seguridade que pida a “inmediata” retirada desta campaña “acosadora dun dereito regulado e absolutamente lícito das mulleres”.
Na mesma liña falou o concelleiro nacionalista, Xabier P. Igrexas, que asegurou que se trata dunha propaganda “reaccionaria” da “dereita ultracatólica” que usa estes paneis para propagar o seu “discurso do odio”.
Tamén solicitou ao Concello que ordene a retirada desta publicidade. “Vigo ten que configurarse como un territorio libre de todas as violencias machistas”, reivindicou Igrexas.
Todo iso despois de que a Asociación Católica de Propagandistas (ACdP) lanzase unha campaña antiabortista en 33 cidades de toda España baixo coa lema “rezar fronte ás clínicas abortistas está xenial” para manifestarse contra a Lei do Aborto que expón o Goberno.
