Marea de Vigo alertou do “risco” que suporía, ao seu xuízo, licitar nun único contrato toda a limpa viaria da cidade, a recollida selectiva do lixo e os colectores por un importe de 490 millóns de euros en 10 anos.

Nun comunicado, o grupo municipal discrepou “profundamente” que agrupar o tres lotes existentes nun sexa algo que recomende a Axenda 2030 para o desenvolvemento sustentable, xa que, segundo o concelleiro Rubén Pérez, “non existe mención algunha a esta cuestión nos Obxectivos de Desenvolvemento Sustentable”.

“O Concello navega en contra do que se está aprobando en moitos concellos, desde a propia remunicipalización dos servizos de limpeza, a recollida selectiva a través de empresas públicas de servizos, ata a retirada paulatina de colectores da vía pública para instalar o servizo de recolleita porta por porta”, subliñou Pérez.

Por todo iso, solicitou que se medite este modelo establecendo de novo os lotes a licitar para evitar que unha empresa privada xestione todos os servizos públicos asociados.