Dous menores foron trasladados a un centro hospitalario na tarde deste pasado xoves ao presentar síntomas de intoxicación de monóxido de carbono por mor da mala combustión dun quentador no municipio da Cañiza.
Segundo informou o 112 Galicia, os feitos sucederon na parroquia de Oroso, sobre as 19,30 horas deste xoves. O servizo de emerxencias recibiu a alerta do escape de gas a través de Urxencias Sanitarias de Galicia-061.
Tras iso, o CIAE 112 Galicia puxo a situación en coñecemento do GES de Ribadavia, do GES-SPEIS de Ponteareas, da Garda Civil e da empresa subministradora do gas.
O 061 mobilizou dúas ambulancias de soporte vital básico e un equipo sanitario de Atención Primaria que levaron aos dous menores ao Hospital Álvaro Cunqueiro de Vigo, confirmaron a Europa Press fontes sanitarias.
