O alcalde de Vigo, Abel Caballero, o novo presidente da Zona Franca, David Regades, e a presidenta da Deputación de Pontevedra, Carmela Silva, visitaron este xoves pola mañá a montaxe das instalacións deportivas do Marisquiño, festa internacional do deporte urbano que se celebrará os días 10, 11 e 12 de agosto na nosa cidade.
Neste acto público, o alcalde vigués lamentouse do “abandono económico” por parte da Xunta de Galicia: “Aportaron millóns de euros aos eventos festivos en Santiago e non aportan nada ás festas do Concello de Vigo, e escasamente 40.000 euros ao Marisquiño”.
Regades congratulouse de que “este ano o tempo vai actuar novamente como patrocinador e se vai portar moi ben”. Ademais, confesou estar moi contento coa integración do baloncesto este ano. É a primeira edición que conta cun torneo de baloncesto 3×3, que se organiza da man da federación internacional de Baloncesto e dentro do seu circuíto mundial.
Carmela Silva, pola súa banda, sinalou como este festival “sitúa a toda esta gran área cuxo centro é Vigo, a cidade máis importante de Galicia, en tódolos lugares do planeta, e iso ten un valor incalculable. Polo que a Deputación de Pontevedra non podía facer outra cousa que colaborar”.
Para rematar, Caballero celebrou de novo o papel renovado dos concellos na noita contra a violencia de xénero: “Un concello como o de Vigo, que estamos tan involucrados en isto, que dedicamos máis de 600.000 euros anuais, non tiñamos a competencia. Pois a partir de mañá a recuperaremos”.
Para Caballero, é un cambio necesario “que a primeira atención á muller vítima de violencia sexan o persoal de servizos sociais dos concellos, persoas, mulleres, psicólogas que coñecen moi ben esta situación”.
