O novo título propio de Ciberseguridade Industrial da Universidade de Vigo (UVigo), único en Galicia, comezará a impartirse esta semana con todas a súa praza cubertas. O coordinador do mesmo, José Ignacio Armesto, xunto co tamén docente Miguel Díaz-Cacho, cualificaron esta acollida de “todo un éxito”.
Esta será a primeira edición dunha titulación propia da UVigo que se sitúa dentro da oferta académica da Escola Aberta de Formación Permanente e que nace para crear pontes entre o perfil formativo industrial e o das tecnoloxías da información e a comunicación “nun contexto de dixitalización das plantas industriais”.
“Trátase de dar resposta ás necesidades do mercado laboral, que demanda para a Industria 4.0 profesionais cun maior nivel de formación tecnolóxica”, explicaron os seus impulsores.
O curso, que se impartirá de forma virtual ata o mes de setembro, busca actualizar os coñecementos dos profesionais do ámbito industrial e tamén formar novos especialistas.
Desde que se aprobou esta nova titulación no mes de outubro, máis de 130 persoas solicitaron información da mesma, o que axudou a que comece esta semana coas súas 30 prazas cubertas. Respecto ao perfil do alumnado, principalmente son galegos, aínda que sete proceden do resto de España e un, de Latinoamérica.
