Axentes da Policía Nacional da Comisaría de Vigo detiveron a unha muller como presunta autora dun delito de roubo con violencia e intimidación, tras abordar á súa vítima nun portal e subtraerlle o bolso. Segundo informaron fontes policiais, os feitos ocorreron na madrugada deste luns, cando o 091 recibiu un aviso dun taxista, que fora testemuña dun roubo nun portal da rúa Travesía de Vigo, cuxas autoras fuxiran á carreira.

Unha dotación trasladouse á zona e atopouse co taxista, que estaba a acompañar á muller vítima do roubo. Esta explicou aos axentes que, cando accedía ao portal da súa vivenda, foi abordada por outras dúas mulleres que, tras un tirapuxa e un forte tirón do pelo, lograron arrebatarlle o bolso e saír fuxindo.

A Policía conseguiu localizar nunha rúa próxima a unha das sospeitosas, cuxo aspecto coincidía coa descrición feita polas testemuñas, e procedeu á súa detención. A suposta ladroa mostrouse moi agresiva e negouse a colaborar cos funcionarios. Ao facerlle un cacheo, os axentes interviñéronlle 3 coitelos de cociña, unhas tesoiras e un sacacorchos. A muller, que conta con antecedentes policiais, foi arrestada, mentres continúan as xestións para tratar de localizar á súacómplice.