O Consello de Administración do Porto de Vigo aprobou este martes por unanimidade o prego de bases para sacar a concurso a concesión dos terreos que ocupa as antiga Factorías Vulcano (agora Astilleros San Enrique), cun investimento mínimo requirida de 974.800 euros máis IVE e un prazo de 10 anos ampliables a 15, se se supera o investimento nun 25 %.
Así o trasladou o presidente da Autoridade Portuaria, Jesús Vázquez Almuíña, que explicou que o prego recolle o uso de construción e reparación naval neses terreos.
Trátase só dunha parte das instalacións do estaleiro, uns 18.000 metros cadrados, xa que a antiga Vulcano ocupa tamén un espazo adicional privado, agora en mans de San Enrique. De feito, o Porto prevé, no seu Plan de Empresa, unha dotación económica de 4,7 millóns de euros para expropiar esa zona, incluíla na Delimitación de Espazos e Usos portuarios (DEU), e ampliar así a concesión.
Estas condicións publicaranse agora no Boletín Oficial do Estado (BOE) e abrirase un prazo dun mes para a presentación de ofertas. A previsión do Porto é que, nun prazo duns 3 ou 4 meses, esa concesión poida estar adxudicada.
ADIAMENTO DE INVESTIMENTO DE BARRERAS
Por outra banda, o presidente do Porto tamén informou da solicitude por parte do estaleiro Barreras de aprazar o último pago do paquete de investimentos comprometidos cando se lle renovou a concesión. Trátase de algo menos dun millón de euros que o novo propietario do estaleiro deberá asumir cando se faga cargo do mesmo.
Así, o Consello de Administración do Porto acordou aprazar ese pago ata o ano que vén a petición de Kroll, a consultora que se está facendo cargo agora de Barreras e do seu proceso de venda. En todo caso, os novos donos do estaleiro deberán facer unha proposta ao Porto sobre o destino dese diñeiro, aínda que Vázquez Almuíña sinalou que “se hai unha proposta sólida, o Porto porá facilidades”.
