Críticas ao recorte de servizos por parte de Renfe no tocante ás liñas férreas de Galicia e as súas rutas. O sindicato CGT vén de anunciar o envío dunha carta á Directora Xeral de RENFE Viaxeiros en Madrid e a Dirección de RENFE en Galicia solicitando un incremento dos servizos ferroviarios; xa que, de acordo coa formación, estes non se corresponden coa “demanda existente nestes intres”.
O desaxuste apuntado polo sindicato céntrase na área de Vigo e as súas conexións. “Non entendemos como días de alto tráfico, cando todos os trens con saida Vigo circulaban completos o tren ALVIA das 8:55 Vigo-Madrid non circulou, quedando viaxeiros sen a posibilidade de utilizar o ferrocarril como medio de transporte”, subliñan, en referencia concreta ás xornadas do 12 de outubro e o 1 de novembro.
O mesmo reclaman para o tren que saía de Vigo a Santiago ás 22:30 e que agora xa non se ofrece, obrigando aos visitantes da cidade olívica a marchar da mesma ás 21:35 dende a Estación de Urzaiz. Consideran que esta problemática “limita as suas actividades de ocio ou restauración na cidade e cando na maioría de cidades con núcleos poboación coa densidade de Vigo, Pontevedra ou Vilagarcía, o servizo ferroviario remata a partir das 23hs”.
Igual é a reclamación no tocante ao tren que partía de Vigo ás 6:58 da mañá rumbo á Coruña pasando por Santiago. “Está obrigando a un bó número de viaxeiros e viaxeiras da provincia de Pontevedra a chegar ao seu traballo en Compostela con mais dunha hora de adianto, xa que dende as 7:40 e as 9:40 non existe ningún tren procedente de Vigo con chegada a Compostela”, destacan, antes de subliñar que “estes recortes de servizos ferroviarios de proximidade de RENFE en Galicia van en contra das estratexias de fomento do tren como medio de transporte nos desprazamentos diarios da cidadanía, promovidas dende as institucións da Unión europea”.
