Investigadores da Universidade de Vigo avalían técnicas de control mecánico e a utilización dun insecto herbívoro para combater a uña de gato, unha planta invasora presente en moitos ecosistemas costeiros da Península Ibérica. Precisamente, a revista Journal of Environmental Management publicou un artigo sobre un dos proxectos nos que traballa o Laboratorio de Ecofisiología Vexetal da UVigo neste ámbito, segundo traslada a universidade.

O artigo foi asinado polos investigadores Noa Núñez-González, Luís González e Jonatan Rodríguez, e avalía a efectividade do control mecánico e a utilización dun insecto herbívoro para combater a uña de gato.

A este respecto, o estudo conclúe que a inoculación directa do insecto ‘Pulvinariella mesembryanthemi’ ou a súa combinación con técnicas de control podería apoiar estratexias da xestión desta planta invasora impulsadas por institucións no marco de programas de actividades de control e erradicación.

PROCURA DE ESTRATEXIAS

Administracións públicas, xestores do territorio e colectivos ecoloxistas traballan desde hai décadas na procura de estratexias para loitar contra esta planta, que invadiu un gran número de ecosistemas costeiros. Polo momento, non se identificou un método de eliminación eficiente, polo que os investigadores desenvolven estudos con este obxectivo.

Unha das principais metodoloxías aplicadas para erradicar a especie consiste nun arranque manual ou mecánico que permita desenraizar a planta. No entanto, os científicos advirten de que esta alternativa “pode aumentar o risco de dispersión de novos fragmentos noutras zonas non invadidas” dado que a planta conta con capacidade para enraizar “varios meses despois de ser arrincada”.