Un acusado dun delito de posesión e distribución de pornografía infantil aceptou unha pena dun ano e seis meses de prisión este xoves na sala do Penal número 1 de Vigo . A vista non se celebrou ao alcanzar as partes un acordo de conformidade polo que se impuxo unha pena de ano e medio de prisión ao procesado, para o que inicialmente a Fiscalía pedira tres anos de cárcere.

Así mesmo, acordouse a suspensión da pena por un período de dous anos condicionado a que este home non volva delinquir. Tamén foi inhabilitado para exercer calquera profesión ou oficio que implique un trato regular con menores durante un período de tres anos superior ao da pena de prisión imposta.

Segundo o escrito de acusación pública, os días 27 e 28 de agosto de 2019 o procesado descargou por Internet no seu computador 16 arquivos de contido pornográfico no que aparecían menores de idade e compartiunos con outros usuarios.

O 5 de febreiro do ano seguinte, practicouse unha entrada e rexistro no seu domicilio e incautáronse varios discos duros. Unha vez analizados, comprobouse que, entre todos os dispositivos, había un total de 507 arquivos de contido pedófilo, nos que podían observarse actividades sexuais explícitas entre maiores e menores de idade, e entre menores. Ademais, varios dos arquivos foran ou estaban a ser compartidos, circunstancia que o acusado coñecía.