As instalacións de Aqualia, concesionaria do servizo de saneamento e abastecemento de Vigo, acolleron este xoves o acto de colocación da primeira pedra da que será a nova estación potabilizadora (ETAP) da cidade, unha obra que asumirá a empresa e na que se prevé un investimento de 23 millóns de euros.

Con este proxecto, que ten un prazo de execución de 18 meses, a capacidade de tratamento da planta pasará de 900 litros por segundo a máis de 2.000 litros. Ademais, utilizaranse membranas de ultrafiltración para a mellora da calidade da auga, o que supón un “fito tecnolóxico” no tratamento.

As obras acometeranse en dúas fases. Na primeira farase a construción, sobre o decantador existente, dun innovador edificio de dúas alturas e planta circular, que albergará canles de floculación e remineralización, asú como os depósitos de auga pretratada, o bombeo, os sistemas de filtración e ultrafiltración.

Unha vez que o edificio estea operativo, a auga ultrafiltrada conducirase por gravidade ao depósito de cabeceira, cunha capacidade de 132.000 metros cúbicos, e desde aí, ao sistema de distribución. Nesta primeira fase tamén se construirá un edificio novo para os reactivos necesarios no tratamento.

Cando todo este sistema estea activo, porase en marcha a segunda fase da operación, que contempla a remodelación da instalación ao completo e a construción dun laboratorio de nova xeración, así como dunha nova sala de control automatizada.

Todos os traballos levarán a cabo sen interromperse o tratamento e distribución de auga ao sistema de abastecemento de Vigo e doutros dous municipios (o que supón medio millón de persoas).

As obras da nova ETAP correrán a cargo da concesionaria, dentro do plan de investimentos vinculado á prórroga da concesión. Segundo asegurou o alcalde, Abel Caballero, a construción da nova planta non repercutirá no recibo da auga dos veciños.