O Colexio Oficial de Traballo Social de Galicia (COTSGA) sumouse este luns ás críticas da Anpa do Colexio de Educación Especial Saladino Cortizo pola perda da traballadora social do centro, que se xubila, e pediu á administración autonómica que manteña esa praza, posto que a súa función no colexio é “decisiva”.
Ante estas denuncias, a consellería de Cultura, Educación e Universidade precisou que este departamento non ten traballadores sociais nin asistentes sociais nos centros de educación especial, aínda que, “nalgún caso excepcional” pode haber algún asistente social “procedente dos antigos equipos psicopedagóxicos de apoio ou transferencias”. En todo caso, matizaron fontes da Consellería, “a contratación dese persoal é unha competencia municipal”.
O COTSGA reclamou a Sanidade que cubra esa praza, xa que sen a traballadora social o alumnado do Saladino Cortizo queda “en absoluto desamparo”. Respecto diso, incidiron en que o labor desa traballadora é “clave para favorecer o establecemento e fortalecemento das relacións entre o medio escolar, o familiar e o comunitario, a integración escolar e social dos nenos que teñen dificultades de adaptación”.
Segundo o Colexio, a figura do traballador/a social está “amplamente estendida” nos centros de educación espacial, polo que “non é razoable que desapareza nun deles”.
