O festival O Marisquiño, celebrado en Vigo o pasado fin de semana, deixou na cidade unha ocupación hoteleira do 92 %, e a próxima ponte festiva, o dos días 13 ao 16 de agosto, prevese chegar ao 95 % de ocupación.
Así o trasladou o alcalde da cidade, Abel Caballero, que sinalou, en rolda de prensa, que a tempada turística estival en Vigo “está a ir francamente ben”. “Está a ser unha boa tempada”, proclamou.
Segundo o rexedor olívico, a cidade “está a consolidarse como destino turístico” tanto no verán, como noutras estacións. Así, en época estival, os visitantes acoden a Vigo atraídos por “as praias, a oferta gastronómica ou a beleza da cidade”.
En Nadal, subliñou, Vigo xa se converteu en “un destino turístico a nivel europeo”, e celebrou que estas boas cifras e expectativas están a facer que o sector da hostalaría vaia “levantando cabeza aos poucos”.
