Socorristas rescataron na tarde deste luns a un home que practicaba windsurf en Nigrán e que non era capaz de regresar á beira. Segundo informa o 112, foi o propio particular quen, pasadas as 18,00 horas, se puxo en contacto co 112 Galicia para solicitar axuda para saír da auga. O home sinalaba que estaba no mar, en Nigrán, entre a praia de Patos e Monteferro, e que non tiña forzas para volver á beira.

O 112 deu aviso a Salvamento Marítimo e aos socorristas da praia, que xa tiñan coñecemento da incidencia e ían camiño do alertante cunha embarcación. Ademais, desde o Centro Integrado de Atención ás Emerxencias de Galicia, tamén se informou ao Servizo de Gardacostas de Galicia, á Policía Local e a Protección Civil de Nigrán.

Os socorristas confirmaron que o particular foi finalmente trasladado ata o areal pola embarcación de socorrismo e que non necesitou asistencia sanitaria.