As alcaldesas do Rosal, Ánxela Fernández, e de Tomiño, Sandra González, reuníronse este luns con traballadores de Imerys Kiln Forniture (IKF), unha empresa histórica da comarca de Baixo Miño dedicada á fabricación de materiais refractarios.

O persoal da compañía leva en folga indefinida desde o 14 de xullo ao non chegar a un acordo coa empresa sobre a dobre escala salarial que se quere prolongar e á liberalización de horarios.

As rexedoras acudiron ata a sede da empresa, na Guarda, para mostrar o seu apoio aos ao redor dos 60 empregados de IKF, unha das compañías máis importantes na zona.

Ánxela Fernández e Sandra González aseguraron aos empregados que os concellos do Rosal e Tomiño farán todo o posible para que se atope unha posible solución.

Pola súa banda, Xulio Vicente, da CIG-Construción de Vigo, lamenta que a empresa non quere tocar por agora a eliminación da dobre escala salarial. “O pasado venres houbo un pequeno achegamento, pero non sabemos en que vai terminar. Quedamos emprazados para volver reunirnos, pero aínda sen data concreta”, indica.